काठमाडौँ । संविधान दिवसका अवसरमा शीतलनिवासमा आयोजित एक समारोहलाई सम्बोधन गर्दै राष्ट्रपति रामचन्द्र पौडेलले देशका सबै राजनीतिक दल तथा सरकारलाई संविधानलाई केवल अक्षरमा मात्र सीमित नराखी जनताको दैनिकीमा महसुस गराउनेतर्फ ध्यान केन्द्रित गर्न जोडदार आग्रह गरेका छन् ।
उनले जनउत्तरदायी, पारदर्शी र नागरिक सर्वोच्चताको सिद्धान्तलाई पूर्ण रूपमा अङ्गीकार गर्ने शासन व्यवस्थाबाट मात्रै संविधानले परिकल्पना गरेका उपलब्धिहरूको वास्तविक रक्षा हुनसक्ने स्पष्ट पारे ।
संविधान घोषणा भएको लामो समय बितिसक्दा पनि नागरिकका मूलभूत आकाङ्क्षाहरू पूर्ण रूपमा सम्बोधन हुन बाँकी रहेकोतर्फ सङ्केत गर्दै उनले लोकतन्त्रको जग बलियो बनाउनका लागि पनि संविधानको इमानदार र प्रभावकारी कार्यान्वयन अपरिहार्य रहेको औँल्याए ।
