काठमाडौँ । नेपाल प्रिमियर लिग (एनपीएल) अन्तर्गत सोमबार सम्पन्न खेलमा काठमाडौँ गोर्खाजले चितवन राइनोजलाई १० रनले पराजित गरेको छ ।
जितका लागि काठमाडौँले प्रस्तुत गरेको १८१ रनको लक्ष्य पछ्याएको चितवन राइनोज २० ओभरमा ७ विकेट गुमाउँदै १७० रनमा समेटियो। चितवनका लागि रवि बोपाराले ५५ रनको अर्धशतकीय पारी खेले भने डान मोउसलीले २९ र कामील मिशाराले २८ रन जोडे । बलिङतर्फ काठमाडौँका सहान अराचचिगेले २ विकेट लिए ।
यसअघि टस हारेर पहिले ब्याटिङको निम्तो पाएको काठमाडौँ गोर्खाजले निर्धारित २० ओभरमा ८ विकेट गुमाएर १८० रनको योगफल तयार पारेको थियो । काठमाडौँका लागि राशिद खानले ५२ रनको उत्कृष्ट अर्धशतकीय पारी खेलेका थिए भने सहान अराचचिगेले ३३ र विलियम बोसिस्टोले २७ रनको योगदान दिए । चितवनका बलर रिजन ढकालले ३ विकेट लिए भने कमल सिंह ऐरी र सिकन्दर राजाले समान २-२ विकेट हात पारे ।
यस जितसँगै काठमाडौँ गोर्खाज ५ खेलबाट ८ अंक जोड्दै तालिकाको शीर्ष स्थानमा उक्लिएको छ। पराजित चितवन राइनोजको भने ५ खेलमा ५ अंक छ ।
