काठमाडौँ । नेपाल प्रिमियर लिग (एनपिएल) अन्तर्गत आज कीर्तिपुरस्थित त्रिवि क्रिकेट मैदानमा दुई रोमाञ्चक खेलहरू हुँदैछन् ।
पहिलो खेलमा आज दिउँसो साढे १२ बजे कर्णाली याक्स र पोखरा एभेन्जर्सबीच प्रतिस्पर्धा हुँदैछ । कर्णाली अहिलेसम्म ४ खेलमा २ जित र २ हारसहित ४ अंक जोड्दै प्लेअफ सम्भावना जीवित राख्न संघर्षरत छ भने पोखराले हालसम्म खेलेका चारै खेलमा पराजय भोग्दै अंकविहीन अवस्थामा छ ।
त्यस्तै, आज साँझ ५ बजे हुने दोस्रो तथा महत्त्वपूर्ण खेलमा चितवन राइनोज र काठमाडौँ गोर्खाज आमने-सामने हुनेछन् । चितवन ४ खेलमा ५ अंकसहित चौथो स्थानमा छ भने काठमाडौँ ४ खेलमा ३ जित र १ हारसहित ६ अंकका साथ तालिकाको दोस्रो स्थानमा मजबुत स्थितिमा रहेको छ । आजको खेलले अंक तालिकाको समीकरणमा ठूलो फेरबदल ल्याउन सक्नेछ ।
