काठमाडौँ । संयुक्त राष्ट्रसङ्घीय जलवायु परिवर्तनसम्बन्धी पक्ष राष्ट्रहरूको ३१औँ सम्मेलन (कोप–३१) को अवसरमा परराष्ट्रमन्त्री शिशिर खनाल र इथियोपियाका विदेशमन्त्री गेडियन टिमोथियोसबीच द्विपक्षीय भेटवार्ता भएको छ ।
भेटका क्रममा मन्त्री खनालले हालै नेपालमा गएको विनाशकारी जलवायुजन्य विपद्पछि इथियोपिया सरकार तथा त्यहाँका जनताले प्रकट गरेको सहानुभूति एवं ऐक्यबद्धताप्रति आभार व्यक्त गर्नुभयो ।
साथै, समानता, साझा वातावरणीय उत्तरदायित्व र बहुपक्षीय साझेदारीमा आधारित विश्वव्यापी जलवायु कार्यलाई अघि बढाउन नेपाल प्रतिबद्ध रहेको उहाँले स्पष्ट पार्नुभयो । सो अवसरमा दुई देशबीचको मैत्रीपूर्ण सम्बन्धलाई अझ प्रगाढ बनाउँदै व्यापार, पर्यटन, हवाई सम्पर्क विस्तार तथा अतिकम विकसित मुलुक (एलडीसी) बाट स्तरोन्नति हुने साझा एजेन्डामा सहकार्य गर्ने विषयमा समेत फलदायी छलफल भएको छ ।
