काठमाडौँ । मुलुकभर स्थानीय र पश्चिमी वायुको प्रभावका साथै पूर्वी क्षेत्र नजिक बनेको न्यून चापीय प्रणाली सक्रिय भएको छ ।
यसका कारण अहिले देशभरिकै आकाशमा बादल लागेको जल तथा मौसम विज्ञान विभागले जनाएको छ । हाल कोशी, मधेश, बागमती र गण्डकी प्रदेशका केही ठाउँमा मेघगर्जन र चट्याङ्गसहित हल्कादेखि मध्यम वर्षा भइरहेको छ ।
आज दिउँसो कोशी, बागमती र गण्डकी प्रदेशमा सामान्य बदली रहने देखिन्छ । मधेश लगायत अन्य प्रदेशका पहाडी तथा हिमाली क्षेत्रमा आंशिक बादल लागे पनि तराईका बाँकी भू–भागमा भने मौसम सामान्यतया सफा रहनेछ । विभागका अनुसार कोशी, बागमती र गण्डकी प्रदेशका पहाडी तथा हिमाली भेगका केही स्थानमा चट्याङ्गसहित वर्षा र हिमपातको सम्भावना छ । यस्तै मधेश, लुम्बिनी, कर्णाली र सुदूरपश्चिमका थोरै स्थानमा पनि पानी पर्ने अनुमान गरिएको छ । सुदूरपश्चिम र लुम्बिनी प्रदेशका पहाडी इलाकामा दिउँसो गर्मी बढ्ने र तराई क्षेत्रमा तातो हावा (लू) चल्न सक्ने भएकाले सतर्कता अपनाउन भनिएको छ । यसैगरी, मधेश र कोशी प्रदेशका तराई क्षेत्रमा दिउँसोतिर हावाहुरी चल्ने सम्भावना छ ।
रातिको समयमा कोशी प्रदेश र अन्य हिमाली क्षेत्रमा बादल लाग्नेछ । बागमती, गण्डकी र लुम्बिनीका पहाडी भागमा आंशिक बदली भए पनि बाँकी ठाउँको मौसम सफा रहनेछ । राति पनि कोशी, बागमती, गण्डकी, लुम्बिनी र कर्णालीका कतिपय पहाडी तथा हिमाली क्षेत्रमा मेघगर्जनसहित हल्का वर्षा वा हिमपात हुन सक्ने मौसम पूर्वानुमान महाशाखाले जनाएको छ ।
