काठमाडौँ । मन्त्रिपरिषद्को बैठकले शिक्षा नियमावलीमा समसामयिक परिमार्जन गर्दै ‘शिक्षा दसौँ संशोधन नियमावली २०८३’ लाई पास गरेको छ ।
बिहीबार सिंहदरबारमा बसेको बैठकले शिक्षा क्षेत्रको सुधारका लागि महत्त्वपूर्ण मानिएको यो नियमावली स्वीकृत गर्ने लगायत विभिन्न प्रशासनिक तथा नीतिगत निर्णयहरू गरेको हो ।
सरकारले आर्थिक क्षेत्रसँग जोडिएका केही नेपाली कानुनहरूलाई संशोधन तथा खारेज गर्नका लागि बनेको विधेयकलाई संघीय संसदमा दर्ता गराउने अनुमति दिएको छ । यसका साथै , अन्तर्राष्ट्रिय महासागरहरूको जैविक विविधता संरक्षणसँग सम्बन्धित ‘बीबीएन्जी’ सम्झौतालाई अनुमोदनका लागि संसदमा पेस गर्ने निर्णय समेत भएको छ ।
प्रशासनिक तर्फ सरकारले नेपाल प्रहरीका आठ जना प्रहरी अतिरिक्त महानिरीक्षक (एआईजी) हरूको सरुवा गरेको छ । त्यस्तै , विभिन्न सरकारी निकायहरूमा नयाँ नियुक्तिहरू गरिएको छ , जसअन्तर्गत विशिष्ट संरचना सञ्चालन तथा व्यवस्थापन विकास समितिको कार्यकारी निर्देशकमा धर्मराज खड्का (धनकुटा) , गोरखापत्र संस्थानको महाप्रबन्धक पदमा हिक्मत बहादुर रावल (कैलाली) र सुरक्षण मुद्रण केन्द्रको कार्यकारी निर्देशकमा देवराज ढुङ्गाना (मोरङ) नियुक्त भएका छन् ।
बैठकले देशमा सुशासन र सञ्चार क्षेत्रलाई थप व्यवस्थित बनाउन ‘राष्ट्रिय सदाचार नीति २०८३’ र ‘राष्ट्रिय विज्ञापन नीति २०८३’ लाई पनि स्वीकृत गरेको छ । यसका साथै , सामाजिक सुधारका क्रममा ‘कमैया श्रम निषेध गर्ने सम्बन्धी पहिलो संशोधन नियमावली २०८३’ लाई समेत मन्त्रिपरिषद्ले पारित गरेको छ ।
