चितवन । मुग्लिङ–नारायणगढ सडकखण्ड अन्तर्गत इच्छाकामना गाउँपालिका–६ जलबिरे नजिकै आइतबार बिहान भएको त्रिपक्षीय सवारी दुर्घटनामा परी घाइते हुनेको संख्या ३३ पुगेको छ ।
दुईवटा यात्रुवाहक बस र एउटा ट्रक एकआपसमा ठोक्किँदा उक्त दुर्घटना भएको हो । प्रहरीका अनुसार काठमाडौंबाट दाङतर्फ प्रस्थान गरेको लु.प्र.०३–००१ ख ०५०५ नम्बरको बस र विपरीत दिशा सर्लाहीबाट काठमाडौंतर्फ आउँदै गरेको म.प्र.०३–००२ ख ७३२ नम्बरको बस एकापसमा जुधेका थिए । सोही क्रममा सर्लाहीतर्फबाटै आउँदै गरेको बा.प्र.०३–००१ ख १६७१ नम्बरको ट्रकसमेत बससँग ठोक्किन पुगेको थियो ।
दुर्घटनाका तत्कालै उद्धार गरिएका सबै ३३ जना घाइतेहरूलाई उपचारका लागि भरतपुर पठाइएको छ । जसमध्ये २४ जनाको नयाँ मेडिकल कलेज र ९ जनाको पुरानो मेडिकल कलेज भरतपुरमा उपचार भइरहेको छ ।
दुर्घटनाका कारण तीनवटै सवारीसाधनमा ठूलो क्षति पुगेको छ । दुर्घटनालगत्तै पूर्ण रूपमा अवरुद्ध बनेको मुग्लिङ–नारायणगढ सडकखण्ड अहिले दुवैतर्फ सुचारु भइसकेको छ । प्रहरीले घटनाको सम्बन्धमा थप अनुसन्धान अघि बढाएको जनाएको छ ।
