दाङ । पूर्वपश्चिम राजमार्गमा यात्रा गर्ने यात्रुलाई अस्वस्थकर र बासी खाना बिक्री गर्दै आएको एक होटललाई प्रशासनले कारबाही गरेको छ ।
राप्ती गाउँपालिका–३ मसुरीयामा सञ्चालित पूर्वपश्चिम हाइवे होटलले पटक-पटक दिइएको सुधारको निर्देशनलाई बेवास्ता गरेपछि खाद्य प्रविधि तथा गुण नियन्त्रण कार्यालय र प्रशासनको टोलीले रु. २५ हजार जरिवाना गराएको हो ।
सहायक प्रमुख जिल्ला अधिकारी सावित्रा पुन तथा खाद्य प्रविधि कार्यालयका प्रमुख पदम बरालसहितको टोलीले उक्त होटलको अनुगमन गर्दा फ्रिजमा बासी खाना भण्डारण गरिएको, तरकारीमा हानिकारक कृत्रिम रङ मिसाइएको र भान्सा क्षेत्र अत्यन्तै दुर्गन्धित अवस्थामा भेटेको थियो । यसबाहेक होटलले मूल्यसूची समेत नराखेको र सरसफाइमा चरम लापरबाही गरेको पाइएपछि टोलीले तत्कालै जरिवाना तोकेको हो ।
पटक-पटकको चेतावनीलाई समेत अटेर गरेपछि कडा कदम चालिएको र तोकिएको जरिवाना रकमसहित एक साताभित्र आवश्यक कागजात लिएर जिल्ला प्रशासन कार्यालयमा उपस्थित हुन निर्देशन दिइएको छ । शुक्रबार सोही अनुगमन टोलीले देउखुरी क्षेत्रका अन्य सातवटा होटलहरूको समेत स्थलगत निरीक्षण गरेको थियो।
