काठमाडौँ । नेपाल प्रिमियर लिग (एनपीएल) को आगामी सिजनका लागि काठमान्डु गोर्खाजले अस्ट्रेलियाका चर्चित ब्याट्सम्यान डेभिड वार्नरलाई टोलीमा सामेल गरेको छ ।
काठमान्डु गोर्खाजले सामाजिक सञ्जालमार्फत वार्नरसँगको सम्झौताबारे औपचारिक जानकारी दिएको हो । वार्नर एनपीएलको इतिहासमै खेल्न आउन लागेका हालसम्मकै उच्च कदका अन्तर्राष्ट्रिय खेलाडी हुन् । ३९ वर्ष पुगेका वार्नरले अस्ट्रेलियालाई दुई पटक एकदिवसीय विश्वकप, एक पटक टी-२० विश्वकप र विश्व टेस्ट च्याम्पियनसिपको उपाधि दिलाउन महत्त्वपूर्ण भूमिका खेलेका छन् ।
यसअघि गोर्खाजले श्रीलंकाका अलराउन्डर सहान अराचचिगे र भारतका विकेटकिपर-ब्याट्सम्यान केएस भरतलाई टोलीमा आबद्ध गरिसकेको छ ।
करण केसीको कप्तानीमा रहेको काठमान्डु गोर्खाजले यसपटक भिम सार्की, आदील आलम, रशिद खान, सन्तोष यादव र शाहाब आलमलाई यथावत् राखेको छ । त्यसैगरी अक्सनमार्फत प्रसिद्ध जैसी, दयानन्द मण्डल, सोनु देवकोटा, कृष्ण पौडेल, साहिल पटेल, देव शाह र सुयान्शु कोइरालालाई टोलीमा भित्राएको छ ।
एनपीएलको तेस्रो संस्करण आगामी कात्तिक ९ देखि मंसिर ५ गते (अक्टोबर २६ देखि नोभेम्बर २१) सम्म सञ्चालन हुनेछ ।
