काठमाडौँ । बंगालको खाडीमा सक्रिय चक्रवात ‘अर्नब’ का कारण आगामी दिनमा नेपालका धेरैजसो भूभागमा वर्षा, भारी वर्षा र हिमाली क्षेत्रमा हिमपातको सम्भावना रहेको मौसम पूर्वानुमान महाशाखाले जनाएको छ ।
शुक्रबार र शनिबार चक्रवातको असर मुख्य रूपमा देखिने अनुमान गरिएको छ। कोशी, मधेस, बागमती, गण्डकी र लुम्बिनी प्रदेशका धेरै स्थानमा मेघगर्जन, चट्याङ र हावाहुरीसहित मध्यमदेखि भारी वर्षा हुन सक्नेछ। त्यस्तै, कर्णाली र सुदूरपश्चिम प्रदेशका पनि केही क्षेत्रमा वर्षाको सम्भावना रहेको छ ।
उच्च पहाडी तथा हिमाली भूभागमा भारी हिमपात, हिमआँधी र पहिरोको जोखिम रहेकाले यात्रा गर्दा उच्च सतर्कता अपनाउन आग्रह गरिएको छ। धानबाली काट्ने तथा भित्र्याउने बेला भएकाले किसानहरूलाई अन्न सुरक्षित राख्न र आवश्यक पूर्वतयारी गर्न विशेष अनुरोध गरिएको छ ।
