काठमाडौँ । मुलुकभर विभिन्न मौसमी प्रणालीको संयुक्त प्रभावका कारण हिजोआज मौसममा व्यापक बदली र वर्षा भइरहेको छ ।
जल तथा मौसम विज्ञान विभागका अनुसार नेपालको उपल्लो वायुमण्डलमा रहेको पश्चिमी न्यून चापीय रेखा, स्थानीय वायु र देशको नजिकै पूर्वदेखि पश्चिमसम्म फैलिएको न्यून चापीय रेखाको प्रभावले देशभरि नै मौसममा फेरबदल आएको हो । अहिले कोशी, मधेश, बागमती र गण्डकी प्रदेशमा पूर्ण रूपमा आकाश बादलले ढाकेको छ ।
त्यस्तै, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा साधारण बदली रही बाँकी तराई क्षेत्रमा आंशिक रूपमा बादल लागेको छ । हाल कोशी, लुम्बिनी, कर्णाली र सुदूरपश्चिम प्रदेशका थोरै स्थानहरूमा मध्यम खालको वर्षा भइरहेको छ ।
आज दिउँसो पनि देशभरिको मौसम साधारणतया बदली नै रहने अनुमान गरिएको छ । सुदूरपश्चिम, कर्णाली र लुम्बिनी प्रदेशका धेरैजसो स्थानका साथै कोशी, बागमती र गण्डकी प्रदेशका पहाडी तथा हिमाली भू-भागमा मेघगर्जन र चट्याङ्गसहित हल्कादेखि मध्यम वर्षा र हिमपातको सम्भावना छ ।
यसैगरी, मधेश प्रदेशसहित कोशी, बागमती, गण्डकी, लुम्बिनी र सुदूरपश्चिम प्रदेशका तराई क्षेत्रका केही स्थानहरूमा पनि पानी पर्ने विभागले जनाएको छ । वर्षासँगै देशका पहाडी तथा तराईका कतिपय क्षेत्रमा तीव्र गतिको हावाहुरी चल्ने सम्भावना रहेकाले सचेत रहन आग्रह गरिएको छ ।
आज राति भने सुदूरपश्चिम प्रदेश लगायत देशका पहाडी र हिमाली भेगमा साधारण बदली रहने र बाँकी ठाउँमा मौसम आंशिक सफा रहने देखिन्छ । रातिको समयमा सुदूरपश्चिम, कर्णाली र गण्डकी प्रदेशका पहाडी तथा हिमाली क्षेत्रका थोरै स्थानमा र कोशी, बागमती तथा लुम्बिनी प्रदेशका उच्च हिमाली भागका एक-दुई स्थानमा हल्का वर्षा र हिमपात हुन सक्ने पूर्वाधार छ ।
