काठमाडौँ । मुलुकका विभिन्न विश्वविद्यालयहरूमा रिक्त रहेको उपकुलपति पद पूर्ति गर्ने कार्यले यतिबेला गति लिएको छ ।
सरकारले विभिन्न ८ वटा विश्वविद्यालयका लागि प्राप्त आवेदनहरूमध्ये मापदण्ड पुगेका उम्मेदवारहरूको दरखास्त स्वीकृत गर्दै छनोटको औपचारिक प्रक्रियालाई अगाडि बढाएको हो । उपकुलपति बन्न इच्छा देखाउँदै कुल २१८ जनाले आवेदन दिएकोमा आवश्यक योग्यता पुगेका १८८ जनाको दरखास्त मात्र स्वीकृत भएको छ ।
अहिले त्रिभुवन विश्वविद्यालय, पोखरा विश्वविद्यालय, पूर्वाञ्चल विश्वविद्यालय, लुम्बिनी बौद्ध विश्वविद्यालय, कृषि तथा वन विज्ञान विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय र राजर्षिजनक विश्वविद्यालयमा नयाँ उपकुलपति नियुक्ति गर्ने तयारी भइरहेको छ ।
सरकारले ‘विभिन्न विश्वविद्यालयको उपकुलपति छनोट तथा सिफारिससम्बन्धी एकीकृत कार्यविधि, २०८३’ लागू गरी सोही बमोजिम आवेदनहरूको विस्तृत मूल्यांकन गरेर योग्य उम्मेदवारहरूको प्रारम्भिक सूची तयार पारेको हो ।
