काठमाडौँ । संघीय संसद् अन्तर्गत प्रतिनिधि सभाका दुई महत्त्वपूर्ण समितिहरूको बैठक सोमबार बस्दैछ ।
आज कानुन, न्याय तथा मानव अधिकार समिति र सार्वजनिक लेखा समितिको बैठक बोलाइएको हो ।
संसद् सचिवालयका अनुसार कानुन समितिको बैठक दिउँसो १२:३० बजेका लागि तय गरिएको छ । उक्त बैठकमा कानुन, न्याय तथा संसदीय मामिला मन्त्रालयको कार्यक्षेत्र, चालु आर्थिक वर्षको प्रगति समीक्षा तथा आगामी कार्ययोजनाका विषयमा विस्तृत छलफल हुने कार्यसूची रहेको छ । यसका साथै, समितिले यसअघि होल्डिङ सेन्टरहरूमा गरेको स्थलगत अनुगमनको प्रतिवेदनमाथि पनि बैठकमा छलफल गरिने जनाइएको छ ।
यसैगरी, बिहान ११ बजेदेखि सार्वजनिक लेखा समितिको बैठक सुरु हुँदैछ । लेखा समितिको बैठकमा बेरुजुको मात्रा बढी देखिएका विभिन्न मन्त्रालयका लेखा उत्तरदायी अधिकृत (सचिव) हरूलाई आमन्त्रण गरिएको छ । बैठकमा ती मन्त्रालयहरूको बेरुजु न्यूनीकरण गर्ने र वित्तीय अनुशासन कायम गर्ने उपायहरूका बारेमा गहन छलफल हुने कार्यसूची तय भएको समितिले उल्लेख गरेको छ ।
