काठमाडौँ । सरकारले निजी अस्पतालहरूबाट उपलब्ध गराउँदै आएको स्वास्थ्य बीमा कार्यक्रमका नियमित सेवाहरूमा रोक लगाएको छ ।
स्वास्थ्य बीमा बोर्डले एक सूचना जारी गर्दै आउँदो शनिबार जेठ १६ गतेदेखि लागू हुने गरी आकस्मिकबाहेकका अन्य सम्पूर्ण स्वास्थ्य सेवाहरू स्थगित गरिएको जनाएको हो ।
बोर्डका निमित्त कार्यकारी निर्देशक शकुन्तला प्रजापतिका अनुसार संस्थामा बढ्दै गएको वित्तीय सङ्कटका कारण यो कदम चाल्नुपरेको हो । अर्को निर्णय नभएसम्मका लागि निजी स्वास्थ्य संस्थाहरूबाट बीमितले आकस्मिक उपचारबाहेकका सेवा पाउने छैनन् । बोर्डका सूचना अधिकारी विकेश मल्लले दिएको जानकारी अनुसार यसअघि मुलुकभरका ३६ वटा निजी अस्पतालहरू यो कार्यक्रममा आबद्ध थिए । यो निर्णयसँगै अब बीमितहरूले बोर्डमा आबद्ध ४४२ सरकारी र २७ सामुदायिक स्वास्थ्य संस्थाहरूबाट मात्रै बीमा सुविधा लिन सक्नेछन् ।
नेपाल सरकारको स्वास्थ्य बीमा कार्यक्रमअन्तर्गत ५ जनासम्मको परिवारले वार्षिक ३ हजार ५०० रुपैयाँ योगदान गरेबापत १ लाख रुपैयाँसम्मको स्वास्थ्य उपचार सुविधा पाउने व्यवस्था छ । ५ जनाभन्दा बढी सदस्य भएमा प्रतिसदस्य ७०० रुपैयाँ थप योगदान गर्नुपर्ने र प्रतिसदस्य २० हजार रुपैयाँ बराबरको सेवा सुविधा थपिँदै जाने प्रावधान रहेको छ । हाल देशभर यस कार्यक्रममा ५९ लाख ७० हजार ४०३ जना बीमित आबद्ध रहेका छन् ।
