काठमाडौँ । प्रतिनिधि सभामा प्लेकार्ड प्रदर्शन गर्ने आफ्नो दलको कदम आगामी दिनमा पनि निरन्तर रहने श्रम संस्कृति पार्टीका अध्यक्ष हर्क साम्पाङले स्पष्ट पारेका छन् ।
बुधबार प्रतिनिधि सभा बैठकमा सहभागी भएर बाहिरिने क्रममा सञ्चारकर्मीहरूसँग कुरा गर्दै अध्यक्ष साम्पाङले विरोधका कार्यक्रम थप सशक्त बनाउने र त्यस क्रममा कारबाही भोग्न समेत आफूहरू पछि नहट्ने बताए । संसद्को गरिमा र जनताको आवाज उठाउने क्रममा निलम्बन हुनुपरे पनि त्यसलाई सहर्ष स्वीकार गर्ने उनको भनाइ थियो ।
सभामुखको भूमिका निष्पक्ष र साझा हुनुपर्नेमा जोड दिँदै उनले आफूहरूलाई निलम्बन गर्न चुनौती दिए पनि त्यसो नगरिएको दाबी गरे । संसद्मा संसदीय दलको नेतालाई बोल्नका लागि दुई-तीन मिनेटको मात्र समय तोकिनु न्यायसङ्गत नभएको भन्दै उनले सभामुख कुनै दलविशेषको नभई सम्पूर्ण सदनको अभिभावक बन्नुपर्ने टिप्पणी गरे ।
सरकारलाई जनताप्रति उत्तरदायी बनाउन आफूहरूले सदनमा प्रश्न उठाएको तर त्यसको उचित सम्बोधन नभएकाले पाँच वर्ष नै विरोध जारी रहन सक्ने साम्पाङले उल्लेख गरे । निरन्तरको दबाबपछि संसद्मा मन्त्रीहरू उपस्थित हुन थाले पनि सभामुखले आफूहरूलाई प्रश्न सोध्ने अनुमति नदिएको भन्दै उनले असन्तुष्टि व्यक्त गरे ।
