काठमाडौँ । मुलुकका विभिन्न भू-भागमा मनसुनी वायुको प्रभाव क्रमशः बढ्दै गएको छ ।
जल तथा मौसम विज्ञान विभागका अनुसार हाल कोशी, मधेश र बागमती प्रदेशका सबै क्षेत्र, गण्डकी प्रदेशका केही भू-भाग तथा लुम्बिनी प्रदेशको पूर्वी क्षेत्रमा मनसुनी वायु सक्रिय रहेको छ । बाँकी रहेका गण्डकी, लुम्बिनी, कर्णाली र सुदूरपश्चिम प्रदेशका भू-भागमा भने आगामी दुई देखि तीन दिनभित्रमा मनसुन प्रणाली भित्रिने सङ्केत देखिएको छ । अहिले ती क्षेत्रमा पश्चिमी र स्थानीय वायुको आंशिक प्रभाव मात्रै रहेको मौसमविद्ले जनाएका छन् ।
आज दिउँसो देशभरकै आकाशमा बादल लाग्ने अनुमान गरिएको छ । कोशी, बागमती र गण्डकी प्रदेशका पहाडी तथा हिमाली क्षेत्रका अधिकांश स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना छ । यस्तै लुम्बिनी, कर्णाली र सुदूरपश्चिमका पहाडी र हिमाली क्षेत्रका केही स्थान तथा तराईका भू-भागमा पनि पानी पर्ने बताइएको छ । विशेषगरी कोशी प्रदेशका पहाडी र तराईका एक-दुई स्थानमा भारी वर्षा हुन सक्ने र मधेश तथा कोशीको तराई क्षेत्रमा तीव्र हावाहुरी चल्ने सम्भावना रहेकाले सचेत रहन आग्रह गरिएको छ ।
रातिको समयमा पनि मौसममा सुधार हुने देखिँदैन । देशभर साधारणतया बदली रही कोशी, बागमती, गण्डकी र लुम्बिनी प्रदेशका धेरैजसो क्षेत्रमा मेघगर्जनसहित मध्यम वर्षा र हिमाली भेगमा हिमपातको सम्भावना छ ।
कर्णाली र सुदूरपश्चिमका थोरै स्थानमा पनि पानी पर्नेछ । राति कोशी प्रदेशका केही स्थानमा भने धेरै भारी वर्षाको जोखिम रहेको विभागको बुलेटिनमा उल्लेख छ ।
साथै मधेश, बागमती र गण्डकी प्रदेशका एक-दुई स्थानमा भारी वर्षा तथा तराईका धेरैजसो स्थानमा तीव्र गतिको हावाहुरी आउन सक्ने भएकाले सतर्कता अपनाउन मौसम पूर्वानुमान महाशाखाले अनुरोध गरेको छ ।
