काठमाडौँ । अखिल नेपाल फुटबल सङ्घ (एन्फा) का पूर्वअध्यक्ष कर्माछिरिङ शेर्पालाई ठगी र आपराधिक विश्वासघातको आरोपमा प्रहरीले नियन्त्रणमा लिएको छ ।
नेपाल प्रहरीको केन्द्रीय अनुसन्धान ब्युरो (सीआईबी) ले हात्तीगौँडास्थित टुङ्गराम इन्टरनेशनल एकेडेमीको ८ करोड ७८ लाख ३० हजार रुपैयाँ अपचलन गरेको कसुरमा अनुसन्धान गर्न उनलाई पक्राउ गरेको हो ।
विद्यालयको कार्यकारी प्रमुखका रूपमा कार्यरत रहँदा शेर्पाले प्रपञ्च र अनुचित प्रभाव प्रयोग गरी संस्थालाई ठुलो आर्थिक हानि पुर्याएको सीआईबीको प्रारम्भिक अनुसन्धानबाट खुलेको छ । उनले विद्यालयलाई अनुचित क्षति पुर्याउने नियतले डर र त्रास देखाई भक्तपुरको दधिकोटमा रहेको २९ रोपनी ४ आना जग्गा आफ्नो निजी कम्पनीको नाममा नामसारी गराएको अनुसन्धानमा देखिएको छ ।
यसका साथै, विद्यालयको सवारीसाधन खरिदका लागि छुट्याइएको रकम सञ्चालक समितिलाई जानकारी नदिई आफ्नै कम्पनीका नाममा जग्गा र गाडी किन्न प्रयोग गरेको र विद्यालयको हक नै समाप्त पारेको आरोप समेत उनीमाथि छ । संस्थाको रकम हिनामिना गरी व्यक्तिगत फाइदा उठाएर ठगी गरेको भन्दै पीडित पक्षले सीआईबीमा उजुरी दिएका थिए ।
नेपाली कांग्रेसमा आबद्ध रहेका शेर्पाविरुद्ध दुई वर्षअघि नै जाहेरी परेको भए तापनि सुरुवाती समयमा राजनीतिक दबाबका कारण प्रहरीले उजुरी दर्ता गर्न आनाकानी गरेको थियो । तर, पीडित पक्ष न्यायको माग गर्दै अदालत पुगेपछि अदालतले जाहेरी दर्ता गरी कानुनी प्रक्रिया र अनुसन्धान अघि बढाउन आदेश दिएको थियो ।
अदालतको उक्त आदेशपछि सीआईबीले अनुसन्धानलाई तीव्र पार्दै उनलाई नियन्त्रणमा लिएको हो । ब्युरोले यस प्रकरणमा जोडिएका अन्य पक्ष र वित्तीय कारोबारको विस्तृत विवरणमाथि थप छानबिन भइरहेको जनाएको छ ।
