काठमाडौँ । फिफा विश्वकप फुटबलको उपाधि होड थप रोमाञ्चक मोडमा पुगेको छ, जहाँ अहिलेसम्म २१ वटा राष्ट्रले नकआउट चरणमा आफ्नो स्थान पक्का गरिसकेका छन् ।
शनिबार बिहानसम्मका खेलहरूको नतिजा अनुसार विभिन्न समूहबाट ९ टोली विजेताका रूपमा र ८ टोली उपविजेता बन्दै अघिल्लो चरणमा प्रवेश गरेका हुन् । यसैगरी, उत्कृष्ट प्रदर्शनका आधारमा आ–आफ्नो समूहमा तेस्रो स्थानमा रहेका थप ४ देशले पनि नकआउटको टिकट काटेका छन् ।
समूह विजेता बन्दै नकआउटमा स्थान बनाउने टोलीहरूमा मेक्सिको, स्वीजरल्याण्ड, ब्राजिल, अमेरिका, जर्मनी, नेदरल्याण्डस, स्पेन, फ्रान्स र अर्जेन्टिना रहेका छन् । त्यसैगरी, दक्षिण अफ्रीका, क्यानडा, मोरक्को, अस्ट्रेलिया, आइभरी कोष्ट, जापान, केप भर्डे र नर्वे उपविजेताका रूपमा अन्तिम १६ को दौडमा सामेल भएका छन् । समूह चरणमा तेस्रो स्थान हासिल गरे पनि नकआउटमा पुग्न सफल हुने भाग्यमानी टोलीहरूमा बोस्निया हर्जगोभिना, पराग्वे, इक्वेडर र स्विडेन परेका छन् ।
प्रतियोगिताको तालिका अनुसार अब नकआउट चरणका खेलहरू निकै प्रतिस्पर्धात्मक हुने देखिएका छन् । जसअनुसार जर्मनीले पराग्वेको सामना गर्नेछ भने फ्रान्स र स्विडेनबीच भिडन्त हुने तय भएको छ । अन्य खेलहरूमा दक्षिण अफ्रिकाले क्यानडासँग, नेदरल्याण्डसले मोरक्कोसँग, अमेरिकाले बोस्निया हर्जगोभिनासँग, ब्राजिलले जापानसँग, आइभरी कोष्टले नर्वेसँग तथा अर्जेन्टिनाले केप भर्डेसँग प्रतिस्पर्धा गर्ने तालिका निश्चित भइसकेको छ ।
