काठमाडौँ । नेपालमा मनसुनी वायु सक्रिय भएसँगै आगामी केही दिनभित्रै वर्षा गराउने प्रणाली थप नजिकिने देखिएको छ ।
हाल देशभरि नै सामान्य बदली भई कोशी, गण्डकी र लुम्बिनी प्रदेशका केही स्थानमा हल्कादेखि मध्यम वर्षा भइरहेको छ । बागमती, कर्णाली र सुदूरपश्चिम प्रदेशका थोरै स्थानमा पनि पानी परिरहेको मौसम पूर्वानुमान महाशाखाले जनाएको छ ।
आज दिउँसो देशभर आंशिकदेखि सामान्य बदली रहनेछ । देशका पहाडी तथा हिमाली भूभागका धेरैजसो स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । तराईका केही क्षेत्रमा पनि पानी पर्नेछ ।
पहाडी भेगका एक-दुई स्थानमा भने भारी वर्षा हुनसक्ने आकलन गरिएको छ । आज राति पनि देशभर बादल लाग्ने र कोशी, बागमती तथा गण्डकी प्रदेशका पहाडी भूभागमा धेरै ठाउँमा पानी पर्नेछ ।
मधेस, लुम्बिनी र सुदूरपश्चिमका केही स्थानमा भारीदेखि धेरै भारी वर्षाको सम्भावना रहेकाले आवश्यक सतर्कता अपनाउन महाशाखाले अनुरोध गरेको छ ।
