काठमाडौँ । मुलुकभर अहिले मनसुनी प्रणाली पूर्ण रूपमा सक्रिय भएसँगै अधिकांश भू-भागमा वर्षा र बादलको प्रभाव देखिएको छ ।
जल तथा मौसम विज्ञान विभागका अनुसार कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशमा साधारणदेखि पूर्ण बदली रही बागमती र लुम्बिनीका धेरैजसो स्थानमा मेघगर्जन र चट्याङसहित मध्यम वर्षा भइरहेको छ । मधेश प्रदेशमा भने आंशिक बदलीको अवस्था छ ।
आज दिउँसो पहाडी तथा हिमाली क्षेत्रमा साधारण बदली र तराईमा आंशिक बदली रहनेछ । गण्डकी, लुम्बिनी, कर्णाली र सुदूरपश्चिमका पहाडी क्षेत्रका केही स्थान तथा कोशी र बागमतीका थोरै स्थानमा चट्याङसहित मध्यम वर्षाको अनुमान गरिएको छ । तराई र हिमाली भेगका थोरै स्थानमा पनि वर्षा र हिमपातको सम्भावना छ ।
रातिको समयमा मौसम थप सक्रिय हुने विभागको पूर्वानुमान छ । विशेषगरी गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा भारी वर्षाको समेत सम्भावना रहेकाले आवश्यक सतर्कता अपनाउन मौसमविद्ले आग्रह गरेका छन् । कोशी, मधेश र बागमती प्रदेशका पहाडी तथा तराई क्षेत्रमा पनि राति हल्कादेखि मध्यम वर्षा हुने देखिन्छ ।
