काठमाडौँ । फिफा विश्वकपको अन्तिम १६ का प्रतिस्पर्धा सकिएसँगै अन्तिम आठमा पुग्ने टोलीहरूको टुङ्गो लागेको छ ।
गएराति सम्पन्न खेलहरूसँगै यस पटकको विश्वकपमा क्वाटरफाइनलको रोचक समीकरण पूरा भएको हो । यस चरणबाट साविकका बलिया दाबेदार पोर्चुगल, ब्राजिल र कोलोम्बिया प्रतियोगिताबाट बाहिरिएका छन् । यसैगरी संयुक्त रूपमा विश्वकप आयोजना गरिरहेका तिनै देश क्यानडा, मेक्सिको र अमेरिकाको यात्रा पनि अन्तिम १६ मै टुङ्गिएको छ ।
अब उपाधि भिडन्तको दौडमा फ्रान्स, मोरक्को, स्पेन, बेल्जियम, नर्वे, इङ्गल्याण्ड, अर्जेन्टिना र स्विट्जरल्याण्ड मात्र बाँकी रहेका छन् । क्वाटरफाइनलका खेलहरू नेपाली समय अनुसार आगामी बिहीबार रातिदेखि सुरु हुनेछन् ।
सार्वजनिक तालिका अनुसार पहिलो क्वाटरफाइनलमा फ्रान्स र मोरक्को भिड्ने छन् । यो खेल बिहीबार राति १:४५ बजे सुरु हुनेछ । यस्तै दोस्रो खेलमा शुक्रबार राति १२:४५ बजे स्पेन र बेल्जियम आमनेसामने हुनेछन् । तेस्रो खेलमा शनिबार राति २:४५ बजे नर्वेले इङ्गल्याण्डको सामना गर्दा चौथो तथा अन्तिम क्वाटरफाइनल खेलमा आइतबार बिहान ६:४५ बजे स्विट्जरल्याण्ड र अर्जेन्टिनाबीच प्रतिस्पर्धा हुनेछ ।
