काठमाडौँ । जल तथा मौसम विज्ञान विभागले देशका विभिन्न भागमा ठूलो पानी पर्ने चेतावनी दिँदै आवश्यक सतर्कता अपनाउन अनुरोध गरेको छ ।
हाल मनसुनको न्यून चापीय रेखा नेपालको तराई भू-भाग नजिक रहेकाले देशभर मनसुनी वायुको प्रभाव बलियो भएको मौसम पूर्वानुमान महाशाखाले जनाएको छ ।
अहिले देशभर आंशिकदेखि सामान्य बदली रही धेरैजसो प्रदेशका केही स्थानमा हल्कादेखि मध्यम वर्षा भइरहेको छ । आज दिउँसो कोशी, बागमती र गण्डकी प्रदेशका पहाडी तथा तराई क्षेत्रका धेरै ठाउँमा मेघगर्जन र चट्याङसहित पानी पर्ने सम्भावना छ । यस्तै मधेस, लुम्बिनी, सुदूरपश्चिम र कर्णाली प्रदेशका पनि केही स्थानमा वर्षाको आकलन गरिएको छ । कोशी, बागमती र गण्डकीका थोरै स्थानमा भने भारी वर्षा हुनसक्ने मौसमविद्को भनाइ छ ।
रातिको समयमा वर्षाको मात्रा थप बढ्ने अनुमान गरिएको छ । कोशी र बागमती प्रदेशका पहाडी तथा तराई क्षेत्रका साथै मधेस प्रदेशका केही स्थानमा भारीदेखि धेरै भारी वर्षाको सम्भावना रहेको छ । कोशी र बागमतीका एक-दुई स्थानमा त अति भारी वर्षा समेत हुन सक्ने भएकाले विशेष सतर्कता अपनाउन भनिएको छ । गण्डकी र लुम्बिनी प्रदेशका केही क्षेत्रमा पनि भारी वर्षाको सम्भावना छ ।
मनसुन थप सक्रिय भई ठूलो वर्षा हुने देखिएकाले पहाडी भू-भागमा पहिरो, गेग्रान बहाव तथा तराईमा बाढी र डुबानको जोखिम बढेको छ । यसबाट दैनिक जनजीवन, कृषि, सडक तथा हवाई यातायात र पर्यटन क्षेत्र समेत प्रभावित हुन सक्ने भएकाले विभागले सबैलाई सचेत रहन आग्रह गरेको छ ।
