काठमाडौँ । चलचित्र ‘बा : एक योद्धा’को मर्मस्पर्शी टिजर सार्वजनिक भएको छ ।
दिव्यदेव पन्त, झरना थापा र सुहाना थापालगायतका कलाकारहरूको मुख्य अभिनय रहेको यो चलचित्र आगामी भदौ १९ गते कुशे औंसी अर्थात् बुबाको मुख हेर्ने दिनको पूर्वसन्ध्यामा प्रदर्शनमा आउने तयारीमा छ ।
सार्वजनिक टिजरमा एउटा सुन्दर र हँसिलाे परिवार अचानक घटेको महाविपत्तिका कारण कसरी तहसनहस हुन्छ भन्ने भावनात्मक कथा प्रस्तुत गरिएको छ । रगतले लत्पतिएका मुख्य पात्र दिव्यदेवको दृश्यबाट सुरु हुने टिजरमा सन्तानको उज्ज्वल भविष्यका लागि बुवाले गर्ने त्याग, संघर्ष र जीवनभर झेल्ने चुनौतीहरूलाई जीवन्त रूपमा देखाउने प्रयास गरिएको छ ।
संगीतकार हरि लम्सालको लेखन तथा पहिलो निर्देशन रहेको यस चलचित्रमा माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापालगायतको पनि अभिनय देख्न सकिन्छ ।
