काठमाडौँ । जल तथा मौसम विज्ञान विभागले देशका विभिन्न भू-भागमा मेघगर्जन र चट्याङसहित वर्षा हुने सम्भावना रहेकाले आवश्यक सतर्कता अपनाउन आग्रह गरेको छ ।
मनसुनी वायुको प्रभाव सक्रिय रहेकाले आज केही प्रदेशका पहाडी तथा हिमाली भू-भागमा भारी वर्षाको सम्भावना रहेको मौसम पूर्वानुमान महाशाखाले जनाएको छ ।
हाल मनसुनको न्यून चापीय रेखा पश्चिम क्षेत्रमा सरदरभन्दा उत्तरतर्फ र पूर्वमा सरदर स्थान वरपर अवस्थित छ । यसकै असरले देशभर आंशिकदेखि साधारणतया बदली भई कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका थोरै स्थानहरूमा हल्कादेखि मध्यम वर्षा भइरहेको छ ।
आज दिउँसो देशभर साधारणतया बदली रहनेछ । पहाडी तथा हिमाली भू-भागका केही स्थान र तराईका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । हिमाली भेगका केही स्थानमा हिमपातसमेत हुन सक्नेछ । विशेषगरी गण्डकी, लुम्बिनी र कर्णाली प्रदेशका पहाडी भू-भागका एक-दुई स्थानमा भारी वर्षाको आकलन गरिएको छ ।
त्यस्तै राति पनि बागमती, गण्डकी र कोशी प्रदेशका पहाडी भू-भागका एक-दुई स्थानमा भारी वर्षा हुन सक्ने महाशाखाको पूर्वानुमान छ ।
भारी वर्षाका कारण गेग्रान बहाव, बाढी, पहिरो र भू-क्षयको जोखिम रहेकाले तटीय तथा जोखिमयुक्त क्षेत्रमा बसोबास गर्नेहरूलाई सजग रहन भनिएको छ । साथै दैनिक जनजीवन, कृषि, स्वास्थ्य, पर्यटनका साथै सडक तथा हवाई यातायातसमेत प्रभावित हुन सक्ने भएकाले पछिल्लो मौसमी सूचनामा अद्यावधिक रहन महाशाखाले अनुरोध गरेको छ ।
