काठमाडौँ । मनसुनी वायुको प्रभावका कारण देशका विभिन्न भू-भागमा मेघगर्जन र चट्याङ्गसहित वर्षाको सम्भावना रहेको मौसम पूर्वानुमान महाशाखाले जनाएको छ ।
जल तथा मौसम विज्ञान विभागका अनुसार मनसुनको न्यून चापीय रेखा सरदर स्थानभन्दा केही उत्तरतर्फ नेपालको तराई भू-भाग नजिक रहेकाले वर्षाको गतिविधि बढेको हो ।
विभागका अनुसार हाल बागमती र गण्डकी प्रदेशका केही स्थानमा मध्यम वर्षा भइरहेको छ । यस्तै कोशी, कर्णाली र सुदूरपश्चिमका थोरै ठाउँमा तथा लुम्बिनी प्रदेशका एक-दुई स्थानमा मेघगर्जनसहित पानी परिरहेको छ ।
आज दिउँसो र राति देशका अधिकांश भागमा साधारणतया बादल लाग्ने अनुमान गरिएको छ । हिमाली भेगका केही स्थानमा वर्षा वा हिमपातको सम्भावना छ । पहाडी र तराईका धेरैजसो स्थानमा चट्याङ्गसहित मध्यम वर्षा हुने देखिन्छ ।
विशेष गरी कोशी, बागमती र गण्डकी प्रदेशका हिमाली तथा पहाडी क्षेत्रका साथै लुम्बिनी प्रदेशका केही स्थानमा भारीदेखि धेरै भारी वर्षाको सम्भावना रहेकाले आवश्यक सतर्कता अपनाउन महाशाखाले आग्रह गरेको छ ।
