काठमाडौँ । जल तथा मौसम विज्ञान विभाग अन्तर्गतको मौसम पूर्वानुमान महाशाखाले हाल देशैभर मनसुनी वायुको प्रत्यक्ष प्रभाव कायम रहेको जनाएको छ । महाशाखाका अनुसार मनसुनको न्यून चापीय रेखा नेपालको पश्चिम भागमा सरदर स्थानभन्दा केही उत्तरतर्फ र पूर्वी भागमा सरदर स्थान वरपर नै अवस्थित रहेको छ ।
अहिले देशभरको आकाश सामान्यतया बादलले ढाकिएको अवस्था छ । लुम्बिनी, कर्णाली र सुदूरपश्चिम प्रदेशका केही भू-भागका साथै कोशी, बागमती र गण्डकी प्रदेशका एक-दुई स्थानमा हल्कादेखि मध्यमसम्म वर्षा भइरहेको महाशाखाले बताएको छ ।
आज दिउँसो पनि देशभरको मौसम बदली रहने अनुमान गरिएको छ । हिमाली क्षेत्रका केही स्थानमा चट्याङ्ग र मेघगर्जनसहित मध्यम वर्षा तथा हिमपातको सम्भावना छ । यसैगरी पहाडी भू-भागका धेरैजसो ठाउँ र तराईका केही क्षेत्रमा मेघगर्जनसहित वर्षा हुन सक्नेछ । विशेष गरी कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भागका एक-दुई स्थानमा भारी वर्षाको सम्भावना रहेको छ । महाशाखाले कोशी प्रदेशको तराई र मधेश प्रदेशका केही क्षेत्रमा तीव्र हावाहुरी चल्न सक्ने चेतावनीसमेत दिएको छ ।
यस्तै आज राति पनि देशभरको मौसम आंशिकदेखि सामान्य बदली नै रहनेछ । देशका हिमाली तथा पहाडी भू-भागमा मेघगर्जन र चट्याङ्गसहित हल्कादेखि मध्यमसम्म वर्षा वा हिमपातको सम्भावना रहेको छ । तराईतर्फ कोशी, मधेश, बागमती र गण्डकी प्रदेशका केही स्थान र लुम्बिनी तथा सुदूरपश्चिम प्रदेशका थोरै ठाउँमा वर्षा हुन सक्नेछ । रातिको समयमा कोशी र बागमती प्रदेशका पहाडी भू-भागका एक-दुई स्थानमा भारी वर्षाको सम्भावना रहेकाले आवश्यक सतर्कता अपनाउन महाशाखाले अनुरोध गरेको छ ।
