काठमाडौँ । जल तथा मौसम विज्ञान विभाग अन्तर्गतको मौसम पूर्वानुमान महाशाखाले हाल देशभर मनसुनी वायुको प्रभाव कायमै रहेको जनाएको छ । महाशाखाका अनुसार मनसुनको न्यून चापीय रेखा सरदर स्थानभन्दा केही उत्तरतर्फ अवस्थित रहेकाले त्यसको प्रत्यक्ष असर मौसममा देखिएको हो ।
आज दिउँसो देशभर साधारणतया बादल लाग्ने अनुमान गरिएको छ । देशका हिमाली तथा पहाडी भू-भागका धेरै स्थानहरूमा मेघगर्जन र चट्याङ्गसहित मध्यम वर्षा तथा हिमपातको सम्भावना रहेको छ । यसैगरी बागमती, गण्डकी, लुम्बिनी र सुदूरपश्चिम प्रदेशका तराई भू-भागका धेरै ठाउँहरूमा अनि मधेश र कोशी प्रदेशका तराई भेगका केही स्थानमा मध्यम वर्षा हुनसक्नेछ । पहाडी भू-भागका साथै बागमती, गण्डकी, लुम्बिनी र सुदूरपश्चिम प्रदेशका तराईका एक-दुई स्थानमा भारी वर्षाको सम्भावना व्यक्त गरिएको छ ।
त्यस्तै आज राति पनि देशभर आंशिकदेखि साधारणतया बदली रहनेछ । कोशी, बागमती, गण्डकी र लुम्बिनी प्रदेशका हिमाली तथा पहाडी क्षेत्रका धेरै स्थान र कर्णाली तथा सुदूरपश्चिमका पहाडी क्षेत्रका केही स्थानमा वर्षा तथा हिमपातको सम्भावना छ । तराई क्षेत्रतर्फ मधेश, कोशी, बागमती र गण्डकीका केही तथा लुम्बिनी र सुदूरपश्चिमका थोरै स्थानमा वर्षा हुने महाशाखाले जनाएको छ ।
रातिको समयमा कोशी प्रदेशका सबै भू-भाग, बागमतीका हिमाली तथा पहाडी भू-भाग, र गण्डकी र लुम्बिनीका पहाडी भेगका एक-दुई स्थानमा भारी वर्षाको सम्भावना छ। विशेष गरी कोशी र बागमती प्रदेशका हिमाली तथा पहाडी क्षेत्रका एक-दुई स्थानमा भने धेरै भारी वर्षा हुनसक्ने पूर्वानुमान गरिएको छ ।
