काठमाडौँ । देशैभर हाल मनसुनी वायुको प्रभाव कायम छ। जल तथा मौसम विज्ञान विभाग, मौसम पूर्वानुमान महाशाखाका अनुसार मनसुनको न्यून चापीय रेखा सरदर स्थानकै आसपासमा अवस्थित रहेको छ ।
महाशाखाका अनुसार हाल देशभर साधारणतया बदलीको स्थिति छ । कोशी, बागमती र गण्डकी प्रदेशका थोरै स्थानहरूमा तथा लुम्बिनी प्रदेशका एक-दुई स्थानमा मेघगर्जन र चट्याङ्गसहित हल्कादेखि मध्यम वर्षा भइरहेको छ ।
आज दिउँसो देशभर साधारणतया बदली रहनेछ। देशका हिमाली र पहाडी भू-भागका केही स्थानहरूमा मेघगर्जन र चट्याङ्गसहित मध्यमसम्मको वर्षा तथा हिमपातको सम्भावना छ ।
त्यस्तै बागमती, गण्डकी र सुदूरपश्चिम प्रदेशका तराई भू-भागका केही स्थान तथा मधेश, कोशी र लुम्बिनी प्रदेशका तराई क्षेत्रमा हल्कादेखि मध्यम वर्षाको आकलन गरिएको छ । कोशी, बागमती, गण्डकी र लुम्बिनी प्रदेशका पहाडी भू-भागका एक-दुई स्थानमा भने भारी वर्षाको सम्भावना रहेको मौसम महाशाखाले जनाएको छ ।
यसैगरी आज राति पनि देशभर साधारणतया बदलीकै अवस्था रहनेछ । कोशी, बागमती र गण्डकी प्रदेशका हिमाली भू-भागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली भेगका थोरै स्थानमा मेघगर्जन र चट्याङ्गसहित मध्यमसम्मको वर्षा/हिमपात हुन सक्नेछ ।
कोशी, बागमती र गण्डकीका पहाडी भू-भागका धेरैजसो ठाउँ तथा अन्य प्रदेशका पहाडी र तराई भू-भागमा समेत मेघगर्जनसहित मध्यमसम्मको वर्षाको सम्भावना छ । कोशी र बागमती प्रदेशका पहाडी तथा तराई क्षेत्र र गण्डकी प्रदेशका पहाडी भेगका एक-दुई स्थानमा रातिको समयमा पनि भारी वर्षा हुनसक्ने पूर्वाअनुमान गरिएको छ ।
