काठमाडौँ । सामाजिक सञ्जाल प्रतिबन्धको विरोधबाट सुरु भई भ्रष्टाचार र बेथितिविरुद्ध ठूलो रूप लिएको जेनजी आन्दोलनको एक वर्ष पूरा भएको अवसरमा सरकारले आज ‘जेनजी शहीद दिवस’ मनाउँदै देशभर सार्वजनिक बिदा दिएको छ ।
गत बिहीबार बसेको मन्त्रिपरिषद् बैठकले भदौ २३ र २४ गते भएको उक्त ऐतिहासिक आन्दोलनको सम्झनामा सार्वजनिक बिदा दिने निर्णय गरेको हो । बेरोजगारी, अवसरको कमी र राज्यको गैरजवाफदेहीपनविरुद्ध युवा पुस्ताले गरेको यस आन्दोलनले मुलुकको राजनीतिक दिशा नै मोडेको थियो ।
आन्दोलनका क्रममा हिंसात्मक घटना हुँदा कुल ७६ जनाले ज्यान गुमाएका थिए । तीमध्ये ४५ जनालाई सरकारले आधिकारिक रूपमा शहीद घोषणा गर्दै उनीहरूका परिवारलाई आर्थिक सहायता र रोजगारीको व्यवस्था मिलाएको छ ।
