काठमाडौँ । हाल देशभर मनसुनी वायुको प्रभाव कायम रहनुका साथै न्यून चापीय रेखा सरदर स्थानभन्दा केही उत्तरतर्फ अवस्थित रहेको जल तथा मौसम विज्ञान विभागले जनाएको छ ।
यसका कारण देशभरको मौसम साधारणतया बदली भई कोशी र बागमती प्रदेशका केही स्थान, गण्डकी, लुम्बिनी र कर्णालीका थोरै स्थान तथा मधेश र सुदूरपश्चिम प्रदेशका एक-दुई स्थानमा मध्यम वर्षा भइरहेको छ ।
आज दिउँसो देशभर आंशिकदेखि साधारणतया बादल लाग्नेछ । देशका हिमाली तथा पहाडी भूभागका धेरैजसो स्थानमा मेघगर्जन र चट्याङ्गसहित मध्यम वर्षाका साथै उच्च भूभागमा हिमपातको सम्भावना रहेको छ । यस्तै बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थान तथा मधेश र कोशी प्रदेशका थोरै स्थानमा वर्षाको सम्भावना छ । पहाडी भूभागका साथै लुम्बिनी र सुदूरपश्चिम प्रदेशका तराई क्षेत्रका एक-दुई स्थानमा भने भारी वर्षाको समेत आकलन गरिएको छ ।
रातिको समयमा पनि देशभरको मौसम बदली नै रहनेछ । कोशी, बागमती र गण्डकी प्रदेशका हिमाली तथा पहाडी भूभागका केही स्थान, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रका थोरै स्थानमा मध्यम वर्षा र हिमपातको सम्भावना छ ।
तराई क्षेत्रका केही स्थानमा मध्यम वर्षा हुनुका साथै कोशी, बागमती र गण्डकी प्रदेशका हिमाली तथा पहाडी भूभागका थोरै स्थानमा भारी वर्षा हुन सक्ने विभागले जनाएको छ ।
