काठमाडौँ । दुबईमा सम्पन्न महिला एसिया कप क्रिकेटको अन्तिम भिडन्तमा श्रीलंकालाई ७२ रनको फराकिलो अन्तरले पछाडि पार्दै भारतीय टोली च्याम्पियन बनेको छ ।
अघिल्लो संस्करणको फाइनलमा व्यहोरेको हारको बदला लिँदै भारतले आठौँ पटक एसिया कपको ट्रफी आफ्नो कब्जामा जमाएको हो ।
दुबई अन्तर्राष्ट्रिय क्रिकेट रंगशालामा टस जितेर ब्याटिङ रोजेको भारतले निर्धारित २० ओभरमा ५ विकेट गुमाउँदै १८३ रनको बलियो योगफल खडा गरेको थियो । भारतका लागि ओपनर शफाली वर्माले आक्रामक ब्याटिङ गर्दै ३९ बलमा ६८ रन जोडिन । उनले २४ बलमै अर्धशतक प्रहार गर्दै प्रतियोगिताको इतिहासमै सबैभन्दा छिटो ५० रन बनाउने कीर्तिमानसमेत आफ्नो नाममा लेखाइन् ।
अर्की ओपनर स्मृति मन्धानाले पनि ३९ बलमा ५९ रनको उत्कृष्ट योगदान दिइन् । यी दुईबीच पहिलो विकेटका लागि १२९ रनको साझेदारी भएको थियो ।
१८४ रनको फराकिलो लक्ष्य पछ्याएको श्रीलंका भारतीय बलिङ आक्रमण सामु धराशायी बन्यो । पूरा २० ओभर खेलेको श्रीलंका १११ रनमा अलआउट हुन पुग्यो । श्रीलंकाका लागि कप्तान चमारी अटापट्टुले बनाएको ३६ रन नै टोलीको सर्वाधिक व्यक्तिगत रन रह्यो । बलिङतर्फ भारतकी श्री चरणीले ४ विकेट र दीप्ति शर्माले ३ विकेट लिँदै विपक्षी टोलीलाई लक्ष्यसम्म पुग्न दिएनन् ।
