काठमाडौँ । जल तथा मौसम विज्ञान विभागअन्तर्गतको मौसम पूर्वानुमान महाशाखाले हाल देशमा मनसुनी र पश्चिमी वायुको आंशिक प्रभाव कायमै रहेको जनाएको छ ।
अहिले हिमाली तथा पहाडी भूभागमा आंशिक बदली छ । कोशी, गण्डकी र लुम्बिनी प्रदेशका एक-दुई स्थानमा हल्का वर्षा भइरहेको छ भने कोशी, मधेश र बागमतीका तराई क्षेत्रमा हुस्सु लागेको छ ।
आज दिउँसो कोशी, बागमती, गण्डकी र लुम्बिनी प्रदेशका हिमाली तथा पहाडी क्षेत्रमा साधारणतया बदली रहनेछ । कर्णाली, सुदूरपश्चिम र तराई भूभागमा भने आंशिक बदलीको सम्भावना छ । पहाडी र हिमाली भेगका केही स्थान तथा मधेशसहित तराईका एक-दुई स्थानमा मध्यमसम्मको वर्षा र उच्च हिमाली क्षेत्रमा हल्का हिमपात हुनसक्ने महाशाखाको भनाइ छ ।
रातिको समयमा कोशी, बागमती र गण्डकीका हिमाली तथा पहाडी भूभागमा साधारणतया बदली रहनेछ भने बाँकी क्षेत्रमा आंशिक बदली रहनेछ । तराईका केही स्थानमा बिहानपख हुस्सु लाग्ने र पहाडी तथा तराईका एक-दुई ठाउँमा हल्का वर्षाको सम्भावना रहेको मौसम पूर्वानुमान महाशाखाले जनाएको छ ।
