काठमाडौँ । चलचित्र क्षेत्रमा दर्शकहरूको उपस्थिति र फिल्महरूको व्यापार कस्तो भइरहेको छ भन्ने चासो राख्नेहरूका लागि चलचित्र विकास बोर्डले हालै बक्स अफिसको ताजा तथ्यांक सार्वजनिक गरेको छ ।
बोर्डले कात्तिक २९ गतेसम्मको विवरण बाहिर ल्याउँदा पछिल्लो समय हलमा लागेका धेरैजसो फिल्महरूले राम्रो संख्यामा टिकट बिक्री गर्न सफल भएको देखिएको छ ।
सार्वजनिक विवरण अनुसार सबैभन्दा बढी कमाइ गर्ने सूचीमा ‘कबड्डी ५ : आफ्टर the फाइनल’ शीर्ष स्थानमा रहेको छ । गत कात्तिक ६ गतेबाट प्रदर्शनमा आएको यस फिल्मले चार लाख २२ हजार आठ सय ९० टिकट बिक्री गर्दै १२ करोड ९४ लाख १५ हजार रुपैयाँको बलियो व्यापार गरेको छ ।
त्यस्तै, भदौ २६ गतेदेखि पर्दामा आएको चलचित्र ‘पेन्सन पट्टा’ पनि आम्दानीको मामिलामा निकै अगाडि देखिएको छ । यस फिल्मले तीन लाख ६४ हजार पाँच सय २० टिकट बिक्री मार्फत १० करोड ३५ लाख ७८ हजार रुपैयाँ संकलन गरेको छ ।
यसैगरी, असोजको अन्तिम साता प्रदर्शनमा आएका फिल्महरूको प्रदर्शन पनि सन्तोषजनक नै रहेको छ । असोज ३० गते रिलिज भएको ‘आ बाट आमा २’ ले दुई लाख ४१ हजार ९६ टिकट बिक्रीबाट ६ करोड ८१ लाख ६७ हजार रुपैयाँ कमाएको छ भने सोही मितिमा हलमा आएको ‘१२ गाउँ २’ ले ७६ हजार ६० टिकट बिक्री गर्दै दुई करोड ३२ लाख ९६ हजार रुपैयाँ जोडेको छ ।
यता असोज ३१ गते प्रदर्शनमा आएको ‘छ माया छपक्कै २’ ले एक लाख छ हजार आठ सय ८३ टिकट बिक्रीबाट तीन करोड ४३ लाख १७ हजार रुपैयाँ आम्दानी गरेको विवरणमा उल्लेख छ । त्यसैगरी, कात्तिक २० गतेबाट दर्शकमाझ आएको चलचित्र ‘पाँच पाण्डव’ ले भने १२ हजार दुई सय ९४ टिकट बिक्री गरी ४३ लाख ५० हजार रुपैयाँको व्यवसाय गरेको छ । समग्रमा नेपाली बक्स अफिसमा फिल्महरूको यस किसिमको व्यापारले चलचित्रकर्मी र दर्शकहरूमा उत्साह थपेको छ ।

