सर्लाही । मकवानपुरको भीमफेदीमा भएको सवारी दुर्घटनाका पीडित परिवार र घाइतेहरूको अवस्था बुझ्न प्रतिनिधिसभाका सभामुख डीपी अर्याल सोमबार सर्लाही पुगेका छन् ।
जिल्ला भ्रमणका क्रममा सभामुख अर्यालले दुर्घटनामा ज्यान गुमाएका व्यक्तिहरूका शोकसन्तप्त परिवार, आफन्त तथा उपचाररत घाइतेहरूसँग प्रत्यक्ष भेटघाट गरी उनीहरूका समस्याबारे जानकारी लिएका हुन् । सो अवसरमा उनले मृतकहरूप्रति श्रद्धाञ्जली अर्पण गर्दै परिवारजनमा गहिरो समवेदना प्रकट गरे । साथै, पीडित परिवार र घाइतेहरूका लागि राज्यका तर्फबाट उचित राहत, क्षतिपूर्ति तथा उपचारको प्रबन्ध मिलाउन आवश्यक पहल गर्ने प्रतिबद्धतासमेत उनले जनाएका छन् ।
गत कात्तिक २६ गते काठमाडौँबाट सर्लाहीतर्फ जाँदै गरेको विद्युतीय माइक्रोबस मकवानपुरको भीमफेदीमा दुर्घटनाग्रस्त हुँदा १४ जनाको मृत्यु भएको थियो भने अन्य ६ जना घाइते भएका थिए ।

