काठमाडौँ । चिनियाँ राजदूत चाङ माओमिङसँगको भेटमा परराष्ट्रमन्त्री शिशिर खनालले तातोपानी सीमा नाका छिटो सञ्चालनमा ल्याउन जोड दिएका छन् ।
सिंहदरबारस्थित परराष्ट्र मन्त्रालयमा भएको छलफलका क्रममा मन्त्री खनालले नेपाल र चीनबीचको सम्पर्क तथा आवतजावत सहज बनाउन उक्त नाकाको महत्त्व औँल्याएका हुन् ।
रसुवा-भोटेकोसी क्षेत्रमा गएको बाढीले रसुवागढी नाका अवरुद्ध भएको र हिउँदयाममा अन्य उच्च हिमाली नाकाहरू पूर्ण क्षमतामा चल्न कठिन हुने अवस्थालाई उनले ध्यानमा राखेका छन् । काठमाडौँबाट सबैभन्दा नजिक पर्ने नाका भएकाले तातोपानीलाई तत्काल सुचारु गर्नुपर्ने उनको धारणा छ ।
‘तातोपानी नाका काठमाडौँसँग सबैभन्दा कम दूरीमा रहेको र यो नाका हाम्रा दुई मुलुकबीचको ऐतिहासिक मित्रतापूर्ण सम्बन्धको प्रतीकसमेत हो,’ मन्त्री खनालले भने, ‘त्यसैले दुई मुलुकबीचको सम्पर्क सञ्जाल र आवागमनलाई सहज बनाउन यो नाका तत्काल खुलाउन आवश्यक छ ।’
जवाफमा राजदूत चाङले तातोपानी नाका सञ्चालनका लागि सम्बन्धित निकायसँग समन्वय गरेर अघि बढ्ने बताएका छन् ।
परराष्ट्रमन्त्रीको सचिवालयका अनुसार भेटवार्तामा बाढीपछिको पुनर्निर्माण, द्विपक्षीय सम्बन्ध, बहुपक्षीयता र आपसी चासोका अन्य विषयमा समेत कुराकानी भएको छ ।

