काठमाडौँ । समकक्षी नरेन्द्र मोदीको औपचारिक निमन्त्रणामा प्रधानमन्त्री बालेन्द्र शाह आज छिमेकी मुलुक भारतको दुई दिने राजकीय भ्रमणका लागि प्रस्थान गर्दै हुनुहुन्छ ।
परराष्ट्र मन्त्रालयले दिएको जानकारीअनुसार प्रधानमन्त्री शाह नेतृत्वको टोली नेपाल वायुसेवा निगमको विमानमार्फत अपराह्न १:४५ बजे नयाँदिल्लीतर्फ उड्ने तय भएको छ ।
भारत सरकारबाट राजकीय सम्मान प्राप्त गर्ने यस भ्रमणका क्रममा उच्चस्तरीय राजनीतिक भेटवार्ताहरू तय गरिएका छन् । प्रधानमन्त्री शाहले भारतीय राष्ट्रपति द्रौपदी मुर्मू र विदेशमन्त्री एस. जयशंकरसँग शिष्टाचार भेटवार्ता गर्नुहुनेछ । त्यसैगरी, भोलि मङ्सिर ७ गते भारतीय प्रधानमन्त्री मोदीसँग प्रतिनिधिमण्डलस्तरीय द्विपक्षीय वार्ता हुने र मोदीले शाहको सम्मानमा दिवाभोजको आयोजना गर्ने कार्यतालिका रहेको छ ।
प्रधानमन्त्रीको ३४ सदस्यीय सरकारी प्रतिनिधिमण्डलमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल र प्रमुख सल्लाहकार कुमार व्यञ्जनकारलगायतका उच्च अधिकारीहरू समावेश छन् । यसका अतिरिक्त निजी क्षेत्रका ५२ जना प्रतिनिधिहरू पनि आफ्नै खर्चमा भ्रमणमा सहभागी हुने मन्त्रालयले स्पष्ट पारेको छ ।
नेपाल र भारतबीच रहिआएको ऐतिहासिक, सांस्कृतिक तथा जनस्तरको सम्बन्धलाई अझ प्रगाढ बनाउँदै द्विपक्षीय सहकार्यका विविध पक्षमा समीक्षा गर्नु भ्रमणको मूल लक्ष्य रहेको छ । भ्रमण सम्पन्न गरी प्रधानमन्त्री शाह भोलि सोमबार नै स्वदेश फर्किनुहुनेछ ।

