काठमाडौँ । नेपालको वायुमण्डलमा हाल पश्चिमी वायुको आंशिक प्रभाव देखिएसँगै देशका विभिन्न भू-भागको मौसममा फेरबदल आएको छ । मौसम पूर्वानुमान महाशाखाका अनुसार विशेष गरी कोशी र गण्डकी प्रदेशका पहाडी तथा हिमाली क्षेत्रमा साधारणतया बदलीको अवस्था रहेको छ भने अन्य प्रदेशका उच्च पहाडी भेगमा आंशिक बादल लागेको छ । तराईका केही स्थानहरूमा भने वायुमण्डलीय स्थितिका कारण तुवाँलो र बिहानीपख हुस्सु लाग्ने क्रम जारी रहेको छ ।
गण्डकी प्रदेशका पहाडी र हिमाली क्षेत्रका एक-दुई स्थानमा अहिले मेघगर्जन र चट्याङसहित हल्का वर्षा र हिमपात भइरहेको छ । सोमबारको मौसम पूर्वानुमान अनुसार कोशी, बागमती र गण्डकी प्रदेशका हिमाली भू-भागमा बादलको बाक्लो उपस्थिति रहने देखिएको छ । बाँकी पहाडी भेगमा भने मौसम आंशिक बदली रहनेछ भने अन्य क्षेत्रमा सामान्यतया सफा रहने महाशाखाले जनाएको छ ।
आज दिउँसो कोशीको पहाडी र हिमाली क्षेत्रका साथै बागमती र गण्डकी प्रदेशका उच्च हिमाली भू-भागका केही स्थानमा हल्का वर्षा र हिमपातको सम्भावना रहेको छ । तराईमा लाग्ने हुस्सु र पहाडी क्षेत्रमा हुने मौसम परिवर्तनले तापक्रममा सामान्य गिरावट आउन सक्ने भएकाले आवश्यक सतर्कता अपनाउन मौसमविद्हरूले सुझाव दिएका छन् ।
