काठमाडौँ । नेपाली खेलप्रेमीहरूको नजर आज घरेलु मैदानमा हुने काभा महिला भलिबल च्याम्पियनसिपको रोमाञ्चक सेमिफाइनल भिडन्ततर्फ सोझिएको छ ।
दशरथ रङ्गशालास्थित कभर्डहलमा साँझ ५ बजे सुरु हुने उक्त महत्वपूर्ण खेलमा आयोजक नेपालले बलियो प्रतिद्वन्द्वी इरानको चुनौती सामना गर्दैछ । यसअघि आजै दिउँसो २:३० बजे हुने पहिलो सेमिफाइनल खेलमा साविक विजेता भारत र काजकिस्तानबीच प्रतिस्पर्धा हुने कार्यतालिका छ ।
प्रतियोगिताको समूह चरणअन्तर्गत ‘पुल ए’ मा रहेको नेपालले दुई खेलमा जित निकाल्दै ७ अङ्कका साथ उपविजेता बन्दै अन्तिम चारको यात्रा तय गरेको हो । अर्कोतर्फ, ‘पुल बी’ मा आक्रामक प्रदर्शन गरेको इरानले आफ्ना तीनै खेलमा बाजी मार्दै समूह विजेताका रूपमा सेमिफाइनलमा स्थान सुरक्षित गरेको थियो ।
नेपाल भलिबल सङ्घको व्यवस्थापनमा जारी यस प्रतियोगितामा नेपाल, भारत, किर्गिस्तान, माल्दिभ्स, इरान, काजकिस्तान, श्रीलङ्का र बङ्गलादेश गरी कुल आठ राष्ट्रले सहभागिता जनाएका छन् । समूह चरणमा नेपालले भारत, किर्गिस्तान र माल्दिभ्ससँगै ‘पुल ए’ मा रहेर प्रतिस्पर्धा गरेको थियो ।
घरेलु कोर्टमा उपाधि जित्ने लक्ष्यका साथ मैदान उत्रिन लागेको १४ सदस्यीय नेपाली टोलीको नेतृत्व निरुता ठगुन्नाले गरिरहेकी छन् । राष्ट्रिय महिला भलिबल टोलीमा कप्तान ठगुन्नासँगै उषा भण्डारी, मिना सुनार, सलिना बुढामगर, कामना विष्ट, रिमा कुँवर, सलिना श्रेष्ठ, बसन्ती साउद, सुमित्रा रेग्मी, सुनिता खत्री, एलिशा मानन्धर, प्रगति नाथ, जसना महतो र शान्तिकला तामाङ समावेश छन् ।
