काठमाडौँ । फिफा फुटबल विश्वकप अन्तर्गत समूह चरणको खेलमा पोर्चुगलले उज्बेकिस्तानमाथि ५-० को फराकिलो जित दर्ता गरेको छ ।
कप्तान क्रिस्टियानो रोनाल्डोको उत्कृष्ट प्रदर्शनको मद्दतले पोर्चुगलले यो एकपक्षीय नतिजा निकालेको हो । खेलको छैटौं मिनेटमा नै जोआओ क्यान्सेलोको क्रसलाई सदुपयोग गर्दै ४१ वर्षीय रोनाल्डोले हाफ भलीमार्फत खाता खोलेका थिए । यो गोलसँगै उनी विश्वकपका लगातार ६ संस्करणमा गोल गर्ने इतिहासकै पहिलो खेलाडी बनेका छन् । साथै, उनी विश्वकप इतिहासमा गोल गर्ने दोस्रो सबैभन्दा बढी उमेरका खेलाडी समेत बनेका छन् । यसअघि सन् १९९४ मा क्यामरुनका रोजर मिल्लाले ४२ वर्षको उमेरमा रुसविरुद्ध गोल गरेर यो सूचीको शीर्ष स्थान ओगटेका थिए ।
पहिलो खेलमा डिआर कङ्गोसँग १-१ को बराबरीमा रोकिएपछि आलोचना खेपेको पोर्चुगलले डेब्युट्यान्ट उज्बेकिस्तानविरुद्ध सुरुवातदेखि नै दबाब कायम राख्यो । खेलको १७औं मिनेटमा नुनो मेन्डेसले करिब २० यार्ड टाढाबाट प्रहार गरेको फ्रिकिक सिधै गोलमा परिणत भएपछि टोलीको अग्रता दोब्बर भयो ।
खेलका दौरान उज्बेकिस्तानका अजीज गानिएभले गोल गरे पनि अब्बोसबेक फैजुल्लाएभले क्यान्सेलोलाई फाउल गरेको भन्दै भिडियो असिस्टेन्ट रेफ्री (भीएआर) ले त्यसलाई मान्यता दिएन । त्यसपछि ३९औं मिनेटमा ब्रुनो फर्नान्डेसको सटिक पासलाई सदुपयोग गर्दै रोनाल्डोले व्यक्तिगत दोस्रो तथा टोलीका लागि तेस्रो गोल गरे ।
उज्बेकिस्तानका गोलरक्षक अब्दुभोहिद नेमातोभबाट आत्मघाती गोल भएपछि पोर्चुगल ४-० ले अघि बढ्यो । खेलको अन्तिम समयमा वैकल्पिक खेलाडीका रूपमा मैदान छिरेका राफाएल लिआओले पाँचौं गोल गर्दै टोलीको जित सुनिश्चित गरे ।
यो जितसँगै दुई खेलबाट ४ अंक जोड्दै पोर्चुगल समूहको शीर्ष स्थानमा उक्लिएको छ । यद्यपि बुधबार हुने अर्को खेलमा कोलम्बियाले डिआर कङ्गोलाई पराजित गरेमा पोर्चुगल दोस्रो स्थानमा झर्न सक्नेछ । लगातार दोस्रो पराजय व्यहोरेको उज्बेकिस्तान भने अंकविहीन छ ।
यस खेलका दुई गोलसँगै रोनाल्डोको विश्वकप कुल गोल सङ्ख्या १० पुगेको छ । उनले सन् २००६, २०१०, २०१४ र २०२२ को विश्वकपमा एक-एक गोल गरेका थिए भने सन् २०१८ को संस्करणमा स्पेनविरुद्धको ह्याट्रिकसहित चार गोल गरेका थिए ।
