काठमाडौँ । मियामीमा सम्पन्न प्रतिस्पर्धात्मक खेलमा स्कटल्यान्डलाई ३-० को सहज गोल अन्तरले पन्छाउँदै ब्राजिल जारी विश्वकप फुटबल २०२६ को समूह ‘सी’ विजेता बन्न सफल भएको छ ।
पहिलो पटक नकआउट चरणमा पुग्ने ऐतिहासिक अवसर सिर्जना गर्न स्कटल्यान्डलाई कम्तीमा एक अङ्कको खाँचो थियो, तर रक्षापङ्क्तिका लगातारका कमजोरी बाधक बन्दा टोलीको यात्रा संकटमा परेको छ । अब उसको अघिल्लो चरणको भविष्य अन्य समूहको समीकरण र नतिजामा मात्र टिकेको छ ।
खेलको प्रारम्भमै स्कट म्याकेन्नाले रक्षात्मक गल्ती गर्दै बल नियन्त्रणमा ढिलाइ गरेपछि ब्राजिलका युवा स्टार रायनले बल खोसेका थिए । सोही बललाई पासका रूपमा उपयोग गर्दै भिनिसियस जुनियरले सुरुवाती गोल गरी ब्राजिललाई अग्रता दिलाए । त्यसपछि पूर्ण रूपमा खेलमा हाबी भएको ब्राजिलका लागि भिनिसियस जुनियरले व्यक्तिगत दोस्रो गोल थपे भने माथेअस कुन्हाले एक गोल योगदान गरे । यस खेलमा सन् २०२३ पछि स्टार खेलाडी नेइमार राष्ट्रिय टोलीमा पुनरागमन गर्नु ब्राजिलका लागि अर्को सुखद पक्ष रह्यो ।
यो जितसँगै ब्राजिल शीर्ष स्थानमा रहँदै अन्तिम ३२ मा छानिएको छ भने पराजित स्कटल्यान्ड ३ अङ्कका साथ उत्कृष्ट तेस्रो टोली बन्ने झिनो आशामा छ । समूह ‘सी’ कै अर्को रोमान्चक खेलमा मोरक्कोले हैटीलाई ४-२ ले हराए पनि ब्राजिललाई उछिन्न सकेन र उपविजेताका रूपमा नकआउट चरणमा पुग्यो ।
एटलान्टामा भएको उक्त खेलमा कमजोर मानिएको हैटीले दुई पटकसम्म अग्रता लिएर मोरक्कोलाई कडा चुनौती दिएको थियो । हैटीका लागि लेनी जोसेफ र विल्सन इसिडोरले गोल गरेका थिए भने मोरक्कोका तर्फबाट अच्राफ हाकिमी, इस्माइल साइबारी, सुफियान रहिमी र गेसिम यासिनले गोल फर्काए । लगातार तीन खेल हारेर प्रतियोगिताबाट बाहिरिए पनि हैटीले ५२ वर्षपछि विश्वकपमा गोल गर्दै आफ्नो ऐतिहासिक उपस्थिति दर्ज गरेको छ ।
