काठमाडौँ । मुलुकभर मनसुनी वायु सक्रिय भएसँगै अधिकांश भू-भागमा बदली र वर्षाको सम्भावना बढेको छ ।
जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार हाल कोशी, मधेश र बागमती प्रदेशका सबै क्षेत्रका साथै गण्डकी र लुम्बिनी प्रदेशका पूर्वी भेगमा मनसुनको बलियो प्रभाव देखिएको छ । बाँकी रहेका सुदूरपश्चिम र कर्णाली प्रदेशसम्म पनि भोलिभित्रै मनसुन फैलिने महाशाखाले अनुमान गरेको छ ।
आज दिउँसो देशभर साधारणतया देखि पूर्ण बदली रहने र कोशी, बागमती तथा गण्डकीका पहाडी भेगका एक-दुई स्थानमा भारी वर्षाको सम्भावना छ । विशेषगरी आज राति कोशी, गण्डकी र लुम्बिनी प्रदेशका पहाडी तथा तराई क्षेत्रका थोरै स्थानमा धेरै भारी वर्षा हुनसक्ने भएकाले सतर्कता अपनाउन मौसमविद्ले आग्रह गरेका छन् ।
तराईका केही जिल्लाहरूमा तीव्र गतिको हावाहुरी चल्ने सम्भावना समेत रहेको छ ।
