काठमाडौँ । पशुपतिनाथलगायत मुलुकभरका प्रमुख शिवपीठहरूमा साउने सोमबारका अवसरमा बिहानैदेखि श्रद्धालुको ठूलो घुइँचो लागेको छ ।
साउन महिनाको पहिलो सोमबार परेकाले हिन्दु धर्मावलम्बीहरू व्रत बसी महादेवको पूजाआजा, रुद्राभिषेक तथा जलचढाउन मन्दिर परिसर पुगेका हुन् ।
काठमाडौँको पशुपतिनाथसँगै भक्तपुरको डोलेश्वर, खोटाङको हलेसी, चितवन र तनहुँको सङ्गमस्थल देवघाटसहित देशभरका साना-ठूला शिवालयहरूमा दर्शनार्थीको लामो लाइन देखिएको छ । भक्तजनको सुविधा र सुरक्षालाई ध्यानमा राख्दै सम्बन्धित मन्दिर व्यवस्थापन समिति र प्रशासनले सुरक्षाकर्मी तथा स्वयंसेवक खटाएर लाइन व्यवस्थापन गरिरहेका छन् ।
सनातन धार्मिक परम्परा अनुसार साउन महिनालाई शिवजीको विशेष प्रिय समय मानिन्छ । यस महिनाका प्रत्येक सोमबार उपवास बसेर शिवजीको स्तुति, मन्त्र जप, जलाभिषेक तथा दानपुण्य गर्नाले चिताएको पुग्ने र सुख-शान्ति मिल्ने जनविश्वास छ । अविवाहितहरूले असल जीवनसाथीको कामना गर्दै र विवाहित महिलाहरूले पारिवारिक समृद्धि तथा पतिको दीर्घायुको प्रार्थनाका लागि सोमबारको व्रत बस्ने गर्छन् ।
साउनभरि शिवालयहरूमा बेलपत्र, धतुरो, दूध र जल चढाएर पूजा गर्ने गरिन्छ । मन्दिरसम्म पुग्न नसक्नेहरूले भने घरमै शिवलिङ्ग स्थापना गरी वा भगवान् शिवको तस्बिरमा मन्त्र जप गर्दै पूजापाठ गरिरहेका छन् ।
