काठमाडौँ । जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार देशभर मनसुनी वायुको प्रभाव सक्रिय रहेको छ । हाल मनसुनको न्यून चापीय रेखा सरदर स्थानको आसपास अवस्थित रहेकाले मुलुकका विभिन्न भागमा बदलीसँगै वर्षाको सम्भावना देखिएको छ ।
महाशाखाका अनुसार आज दिउँसो देशभर साधारणतया बादल लाग्नेछ। हिमाली र पहाडी भू-भागका केही स्थानमा मेघगर्जन र चट्याङ्गसहित हल्कादेखि मध्यमसम्मको वर्षा वा हिमपात हुनसक्ने अनुमान छ । लुम्बिनी र सुदूरपश्चिम प्रदेशका तराई भू-भागका केही स्थानका साथै मधेश, कोशी, बागमती र गण्डकी प्रदेशका तराई भू-भागका थोरै स्थानमा पनि मेघगर्जन र चट्याङ्गसहित वर्षाको सम्भावना रहेको छ । यसैगरी कोशी, कर्णाली र सुदूरपश्चिमका पहाडी भू-भाग, बागमती र गण्डकीका हिमाली क्षेत्र तथा लुम्बिनी प्रदेशका पहाडी र तराईका एक-दुई स्थानमा भारी वर्षाको सम्भावना औँल्याइएको छ ।
त्यसैगरी, आज राति पनि देशभर साधारणतया बदली रहनेछ ।
कोशी, बागमती र गण्डकीका हिमाली भू-भागका केही स्थान तथा लुम्बिनी, कर्णाली र सुदूरपश्चिमका हिमाली क्षेत्रका थोरै स्थानमा मध्यम वर्षा वा हिमपातको सम्भावना छ । कोशी, बागमती, गण्डकी र लुम्बिनी प्रदेशका पहाडी भू-भागका धेरैजसो स्थानमा तथा कर्णाली र सुदूरपश्चिमका पहाडी भेगका थोरै स्थानमा वर्षा हुनसक्छ ।
मधेश प्रदेशसहित कोशी, बागमती, गण्डकी र लुम्बिनीका तराई भू-भागका केही स्थान तथा सुदूरपश्चिमको तराई क्षेत्रका थोरै स्थानमा वर्षाको सम्भावना रहेको छ। कोशी, बागमती र गण्डकी प्रदेशका हिमाली तथा पहाडी भू-भागका साथै लुम्बिनी प्रदेशको पहाडी भू-भागका एक-दुई स्थानमा रातिको समयमा पनि भारी वर्षा हुनसक्ने महाशाखाले जनाएको छ ।
