काठमाडौँ । जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार नेपालभर मनसुनी वायुको असर कायम छ । न्यून चापीय रेखा औसत स्थान आसपास नै रहेकाले देशका विभिन्न भूभागमा मेघगर्जन र चट्याङ्गसहित वर्षा भइरहेको छ ।
महाशाखाका अनुसार आज हिमाली भेगमा वर्षा र हिमपात दुवैको जोखिम छ भने पहाडी तथा तराईका अधिकांश भूभागमा मध्यमसम्मको वर्षा हुने देखिन्छ । मधेस, कोशी र लुम्बिनी प्रदेशका तराई क्षेत्रमा भने हावाहुरीको सम्भावनासमेत छ । विशेष गरी बागमती, गण्डकी र लुम्बिनीका पहाडी र तराईका केही स्थानमा भारी वर्षा हुनसक्ने भएकाले सतर्कता अपनाउन आग्रह गरिएको छ ।
त्यस्तै आज राति पनि देशभर बदली रही पहाडी र तराई भूभागका धेरैजसो स्थानमा मेघगर्जन र चट्याङ्गसहित वर्षा हुने पूर्वानुमान छ । बागमती र गण्डकीका पहाडी क्षेत्र तथा लुम्बिनीको तराईका एक-दुई स्थानमा रातिको समयमा पनि भारी वर्षाको सम्भावना रहेको मौसम महाशाखाले जनाएको छ ।
