काठमाडौँ । जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार देशमा मनसुनी र पश्चिमी वायुको आंशिक प्रभावसँगै बङ्गालको खाडीको पश्चिम-मध्य भू-भागमा न्यून चापीय प्रणाली सक्रिय रहेको छ ।
उक्त मौसमी प्रणाली थप सशक्त बन्दै पश्चिम-उत्तरपश्चिम दिशातर्फ बढ्ने सम्भावना देखिएको छ । अहिले बागमतीसहित पहाडी तथा हिमाली भू-भागमा सामान्य बदली छ भने तराईमा आंशिक बदली रहेको छ । कोशी, बागमती, गण्डकी र लुम्बिनी प्रदेशका केही स्थानमा मध्यम वर्षा भइरहेको छ ।
दिउँसो देशभर आंशिकदेखि साधारणतया बदली रहनेछ। कोशी, बागमती, गण्डकी, लुम्बिनी, कर्णाली र सुदूरपश्चिमका पहाडी तथा हिमाली भेगका थोरै स्थानमा मेघगर्जन र चट्याङ्गसहित हल्कादेखि मध्यम वर्षा अथवा हिमपातको जोखिम छ ।
यस्तै, मधेश लगायत तराईका भू-भागमा पनि मध्यम वर्षाको आकलन गरिएको छ। कोशी र बागमती प्रदेशका पहाडी क्षेत्रका एक-दुई स्थानमा भारी वर्षाको सम्भावना रहेको छ ।
रातीको समयमा पनि देशभर मौसम बदली नै रहनेछ। कोशी प्रदेशका धेरैजसो स्थानमा र अन्य प्रदेशका हिमाली तथा पहाडी भेगमा वर्षा तथा हिमपातको सम्भावना छ ।
कोशी, बागमती, गण्डकी र लुम्बिनीका तराई भू-भागमा मध्यम वर्षा हुन सक्छ। कोशी प्रदेशका केही स्थानमा भने धेरै भारी वर्षाको समेत जोखिम रहेकाले सतर्कता अपनाउन महाशाखाले आग्रह गरेको छ ।
