बैतडी । बैतडीको मेलौली नगरपालिका–१ स्थित सौडानी खोलामा जिप दुर्घटना हुँदा एक महिलाको ज्यान गएको छ भने चालकसहित छ जना घाइते भएका छन् ।
डडेल्धुराबाट पञ्चेश्वरतर्फ जाँदै गरेको सुदूरपश्चिम प्रदेश ०१–००१ ज १६३८ नम्बरको जिप गए राति करिब आठ बजे अनियन्त्रित भई सडकबाट करिब ३० देखि ३५ मिटर तल खसेको हो । दुर्घटनामा परी घाइते भएकी पञ्चेश्वर गाउँपालिका–२ की ३५ वर्षीया सुना मंगोलाको प्राथमिक स्वास्थ्य केन्द्र मेलौलीमा उपचारका क्रममा राति ८:३५ बजे निधन भएको हो ।
सोही दुर्घटनामा परी पञ्चेश्वर गाउँपालिका–२ का २२ वर्षीया सोमनी मंगोला, ११ वर्षीय अविनास राम लुहार, १६ वर्षीय निरज बस्केल, २४ वर्षीय करन सिंह मंगोला, २२ वर्षीय सुनिल बस्केल र जिप चालक ३६ वर्षीय सन्तोष राम लुहार घाइते भएका छन् । घाइतेमध्ये तीन जनाको अवस्था मध्यम रहेको र अन्य तीन जना सामान्य अवस्थामा उपचाररत रहेको प्रहरीले जनाएको छ । यस दुर्घटनाबारे थप अनुसन्धान भइरहेको छ ।
