काठमाडौँ । जल तथा मौसम विज्ञान विभागका अनुसार हाल नेपालको उपल्लो वायुमण्डलमा पश्चिमी न्यूनचापीय प्रणालीको आंशिक प्रभाव रहेको छ । यस प्रणालीका कारण देशका विभिन्न भू-भागमा आंशिकदेखि साधारणतया बदली भई केही स्थानमा मौसममा फेरबदल आउने देखिएको छ । हाल कोशी, बागमती र गण्डकी प्रदेशका पहाडी तथा हिमाली क्षेत्रमा बादल लागेको छ भने बाँकी पहाडी भेगमा आंशिक बदली रहेको छ । तराईका क्षेत्रमा भने अहिले मौसम मुख्यतया सफा रहेको विभागले जनाएको छ ।
आज दिउँसो कोशी प्रदेशका पहाडी र हिमाली भू-भागसहित देशका अन्य हिमाली क्षेत्रमा साधारणतया बादल लाग्नेछ । बाँकी पहाडी भू-भागमा आंशिक बदली रहने भए पनि तराईमा भने मौसम सामान्यतया सफा रहनेछ । यद्यपि, तराईका केही स्थानमा बिहानको समयमा हुस्सु लाग्ने सम्भावना छ । विभागका अनुसार आज कोशी, बागमती र गण्डकी प्रदेशका हिमाली भेगका थोरै स्थानहरूमा र अन्य प्रदेशका हिमाली क्षेत्रका एक-दुई स्थानमा मेघगर्जन र चट्याङ्गसहित हल्का वर्षा वा हिमपात हुन सक्नेछ । साथै, कोशी, बागमती र गण्डकीका पहाडी भू-भागका एक-दुई स्थानमा पनि हल्का वर्षाको सम्भावना रहेको छ ।
आज रातिको समयमा कोशी र गण्डकी प्रदेशका हिमाली क्षेत्रमा साधारणतया बदली रहनेछ भने पहाडी भेगमा आंशिक बदली हुनेछ । तराईका केही स्थानमा राति तुँवालो लाग्न सक्ने अनुमान गरिएको छ । कोशी र गण्डकी प्रदेशका हिमाली भू-भागका एक-दुई स्थानमा राति पनि मेघगर्जन र चट्याङ्गसहित हल्का वर्षा वा हिमपातको सम्भावना रहेको मौसम पूर्वानुमान महाशाखाले जनाएको छ । बाँकी क्षेत्रमा भने रातिको मौसम मुख्यतया सफा रहनेछ ।
