काठमाण्डौ । इन्डोनेसियाको समुद्री क्षेत्रलाई केन्द्रविन्दु बनाएर ७.४ म्याग्निच्युडको शक्तिशाली भूकम्प गएपछि तटीय देशहरूमा उच्च सतर्कता अपनाइएको छ ।
अमेरिकी भूगर्भ सर्वेक्षण संस्था (यूएसजीएस) का अनुसार यो भूकम्प पर्यटकीय तथा ऐतिहासिक महत्व बोकेको टर्नेट शहरबाट करिब १२० किलोमिटरको दूरीमा खनिएको हो । भूकम्पको लगत्तै ५.५ र ५.२ म्याग्निच्युडका दुईवटा शक्तिशाली पराकम्पहरू समेत रेकर्ड गरिएका छन् ।
प्रशान्त महासागरीय सुनामी चेतावनी केन्द्रले भूकम्पको केन्द्रविन्दुबाट एक हजार किलोमिटर वरपरका क्षेत्रहरूमा सुनामी आउन सक्ने खतरा औंल्याएको छ । यस अन्तर्गत इन्डोनेसिया, फिलिपिन्स र मलेसियाका तटीय क्षेत्रहरूमा सावधानी अपनाउन विशेष निर्देशन जारी गरिएको छ ।
भूकम्पको कम्पन टाढा रहेको जापानसम्म महसुस गरिएको छ भने जापानी अधिकारीहरूले समेत समुद्री सतहमा फेरबदल हुन सक्ने भन्दै आफ्ना नागरिकलाई सतर्क गराएका छन् ।
अहिले प्रभावित क्षेत्रहरूमा उद्धार र राहतका टोलीहरू परिचालन गरिएका छन् । भूकम्पबाट भएको भौतिक तथा मानवीय क्षतिको स्पष्ट विवरण संकलन गर्ने काम भइरहेको स्थानीय प्रशासनले जनाएको छ ।
थप शक्तिशाली पराकम्पहरू आउन सक्ने जोखिम कायमै रहेकाले तटीय बासिन्दालाई सुरक्षित स्थानमा रहन र आपतकालीन तयारीलाई तीव्र बनाउन आग्रह गरिएको छ ।
