काठमाडौँ । संघीय संसद्अन्तर्गत तल्लो सदन प्रतिनिधि सभाको बैठक आज (सोमबार) दिउँसो १ बजेका लागि तय गरिएको छ ।
संसद् सचिवालयले सार्वजनिक गरेको कार्यसूची अनुसार आजको बैठकमा विशेषगरी महत्त्वपूर्ण अध्यादेशहरू टेबुल गर्ने तयारी छ । गृहमन्त्री सुदन गुरुङले बैठकमा ‘मतदाता नामावली (पहिलो संशोधन) अध्यादेश २०८२’, ‘प्रतिनिधि सभा सदस्य निर्वाचन (पहिलो संशोधन) अध्यादेश २०८२’ र ‘नेपाल विशेष सेवा (दोस्रो संशोधन) अध्यादेश २०८२’ पेस गर्ने कार्यक्रम रहेको छ ।
यस बैठकलाई विशेष चासोका साथ हेरिएको छ, किनभने नवनिर्वाचित सभामुख डिपी अर्यालले कार्यभार सम्हालेपछि पहिलो पटक सदनको कारबाही अगाडि बढाउँदै छन् ।
निर्वाचनपछिको नयाँ राजनीतिक परिस्थिति र नयाँ सभामुखको नेतृत्वमा सदन कसरी अघि बढ्छ भन्ने विषयलाई राजनीतिक वृत्तमा महत्त्वका साथ हेरिएको छ ।
