काठमाडौँ । सर्वोच्च अदालतकी वरिष्ठतम न्यायाधीश सपना प्रधान मल्ल २० दिनका लागि बिदामा बस्नुभएको छ ।
नवनियुक्त प्रधानन्यायाधीश डा. मनोजकुमार शर्माले कार्यभार सम्हालेकै दिनदेखि लागु हुने गरी उहाँ बिदामा बस्नुभएको हो । सर्वोच्च अदालतका प्रवक्ता अर्जुन कोइरालाले न्यायाधीश मल्ल बिदामा बसेको कुरालाई पुष्टि गर्नुभएको छ ।
यसअघि तत्कालीन प्रधानन्यायाधीश प्रकाशमानसिंह राउतले ६५ वर्षे उमेरहदका कारण अवकाश पाएपछि २०८२ चैत १८ गतेदेखि मल्लले कायममुकायम प्रधानन्यायाधीशको रूपमा सर्वोच्च अदालतको नेतृत्व गरिरहनुभएको थियो । तर, गएको वैशाख २४ गते बसेको संवैधानिक परिषद्को बैठकले रोलक्रममा पछि रहेका न्यायाधीश डा. शर्मालाई प्रधानन्यायाधीश बनाउने सिफारिश गरेपछि उहाँ असन्तुष्ट रहँदै आउनुभएको थियो ।
संसदीय सुनुवाइ समितिले द्रुत प्रक्रिया (फास्ट ट्र्याक) बाट सुनुवाइ टुङ्ग्याएपछि नवनियुक्त प्रधानन्यायाधीश डा. शर्माको नियुक्ति र पदबहाली हिजो एकैदिन भएको थियो ।
